Tikrikèt épi Foumi
Ni on tipawol ka di:
"Pa konté asi zyé a lézot pou domi."
Rété sizé, sizé pou kouté
Sa ki rivé manzé Krikèt.
Pasi péyi kot-soulvan, té ni on jenn tikrikèt
Ki téon jan fengnan.
Toutlé lapli tonbé, té ni fèy, té ni zèb,
Krikèt té anbè a-y, ka manjé adoumanman, ka gwosi, ka vin bèl.
Mé sa Krikèt pa té sav, sé lavi pé chalviré.
Alos kifè, on jou, lapli pa tonbé.
Dé jou, lapli pa tonbé.
Lapli rété mwa émwa pa ka tonbé !
Zèb vin jon, zèb vini sèk, zèb brilé : manjé té bout !
Kriket, fen kon rat, alé touvé manzé Foumi,
On ti-fanm gyok, débouya don pa ni.
I di manzè Foumi konsa :
"Manzè Foumi, tanprisouplè,
Ès ou té ké pé ban-mwen tibwen manjé adan ta-w ?
Zafé an-mwen mélé. Pa tini zèb anko.
Mé ou pa bizwen krent, an ké ba-w lajan !"
Manzè foumi sé jan moun ka di-w :
"Sé sa ka travay la mèt-pyé anba tab."
I mandé Krikèt :
"Lè ou wwè chéchrès ka vin, ka ou té ka fè non timafi ?"
Krikèt réponn :
"Mwen, an té ka chanté pou mété plézi an kè a maléré !"
Alos Foumi pa pèd tan, i di Krikèt konsa :
"Si lidé a-w pa jen di-w,
Fo ou prévwa pou dèmen ; alos mafi, alè,
Apré chanté,
Sé dansé pou ou dansé !"